Iñaki Antiguedad
| Iñaki Antiguedad | |||||||||
|---|---|---|---|---|---|---|---|---|---|
  Irudi gehiago | |||||||||
2011ko abenduaren 12a - 2012ko maiatzaren 16a - Onintza Enbeita → Barrutia: Bizkaia Hautetsia: 2011ko Espainiako hauteskunde orokorrak
1998ko azaroaren 25a - 2001eko martxoaren 20a Barrutia: Bizkaia Hautetsia: Eusko Legebiltzarreko VI. legealdia
1998ko urtarrilaren 13a - 1998ko irailaren 1a ← Tasio Erkizia Barrutia: Bizkaia Hautetsia: Eusko Legebiltzarreko V. legealdia
1990eko abenduaren 18a - 1994ko abuztuaren 30a Barrutia: Bizkaia Hautetsia: Eusko Legebiltzarreko IV. legealdia | |||||||||
| Bizitza | |||||||||
| Jaiotza | Bilbo, 1955eko ekainaren 21a (68 urte) | ||||||||
| Herrialdea |  Bizkaia, Euskal Herria | ||||||||
| Hezkuntza | |||||||||
| Heziketa | Euskal Herriko Unibertsitatea | ||||||||
| Hezkuntza-maila | doktorea | ||||||||
| Hizkuntzak | gaztelania euskara | ||||||||
| Jarduerak | |||||||||
| Jarduerak | politikaria, geologoa eta unibertsitateko irakaslea | ||||||||
| Lantokia(k) | Madril | ||||||||
| Enplegatzailea(k) | Euskal Herriko Unibertsitatea | ||||||||
| Jasotako sariak | ikusi | ||||||||
| Sinesmenak eta ideologia | |||||||||
| Alderdi politikoa |  Herri Batasuna Amaiur | ||||||||
Iñaki Antiguedad Auzmendi (Bilbo, Bizkaia, 1955eko ekainaren 21a) Geologiako irakasle eta ikertzailea, ekologista eta politikaria da. Hidrogeologiako katedraduna da Euskal Herriko Unibertsitateko Zientzia eta Teknologia Fakultatean, Geologia Departamenduan, eta ezker abertzaleko militante historikoa da. Gainera, militante ekologista da, eta hainbat irrati-telebista saiotan kolaboratzaile jardun du.
Bere ikerketa lana uraren kudeaketaz eta hidrologiaz egiten du. Ikertu du Euskal Herriko akuiferoen uraren kalitatea, ea zelako eragina daukaten lurrean burutzen ditugun jarduerek lurrazpiko uretan, eta nolako ondorioak izango ditu klima-aldaketak ur zikloan.[1]
Bizitza
Herri Batasuneko parlamentaria izan zen 1990ean. Ondoren, 1995 eta 1997 bitartean Bizkaiko legebiltzarrean batzarkide izan zen. 1998an Gasteizko Legebiltzarrera itzuli zen, orduan atxiloturiko Tasio Erkizia ordezkatzera. Hurrengo legealdian, seigarren legealdian, biltzarkide hautatua izan zen Euskal Herritarrok alderdiaren zerrendetan.
2004an, Euskal Herriko Unibertsitateko errektoretzarako hauteskundeetara aurkeztu zen, baina Juan Ignacio Pérez Iglesias izan zen errektore hautetsia.
2011n, Espainiako Gorteetako diputatu hautetsi zuten Bizkaitik. Legealdiaren hasieran, Antiguedadek uko egin zion diputatu gisa zegokion soldatari, EHUko irakasle lanpostua zuelako. Hala ere, 2012an, Espainiako Gorteetako Diputatuaren Estatutuaren batzordeak ebatzi zuen bi lan horiek ez zirela bateragarriak, nahiz eta beste hainbat diputaturi bi lan edo gehiago (eta bi soldata edo gehiago) bateratzea onartua zien. Horrenbestez, Antiguedadek diputatu kargua uztera behartua ikusi zuen bere burua. Haren ordez, Onintza Enbeitak hartu zuen kargua.[2][3][4][5][6]
Idazlanak
Anaitasuna aldizkarian 13 artikulu idatzi zituen 1971-1982 urteetan. Eta beste asko Argia aldizkarian, edo Egin, Euskaldunon Egunkaria, Gara eta Berria egunkarietan. Euskal komunitate zientifikoaren Inguma datu-basean, berak egindako ekarpenak 50 baino gehiago dira.[7] Bere liburu aipagarrienak hauek dira:
- Meteorologia hiztegia. (UZEI, 1988), Jabier Agirre Lasarte eta beste batzuekin.
- Biologia /3: ekologia hiztegia. (UZEI, 1987). Pontxio Agirrezabalaga Elosegi eta beste batzuekin.
- Geologia 1. Barneko geodinamika (2. argitalpena) (UEU, 1983 eta 1986)
- Geologia 2. Kanpoko geodinamika (2. argitalpena) (UEU, 1983 eta 1986)
- Nerbioi-Ibaizabal arroaren azterketa hidrogeologikoa: sistema akuifero karstikoen ikerketari ekarpena (Txostena). (UPV/EHU, 1986)
- Arratia hibaiaren arroko azterketa hidrogeologikoa. (UEU, 1980).
Testu-liburuak
Testuliburuak ondu nahiz euskaratzen lan eskerga egin zuen IKER taldean, Saioka euskarazko lehen ikasliburuak sortu zituena.[8] Lehen irakaskuntzarako SAIOKA liburu-bilduma horretan Bizkaiko eta Gipuzkoako Ikastolen Elkarteak zeuden eta besteak beste pertsona hauek: Jose Ramon Etxebarria, Xabier Mendiguren, Xabier Kintana, Imanol Añon, Iñaki Antiguedad, Kepa Martinez de Lagos eta Karmele Baelo.
Sariak eta errekonozimenduak
- 1981: Resurrección Maria Azkue saria euskarazko ikerlanetarako. Bilboko Aurrezki Kutxa.[9]
Erreferentziak
- ↑ Zientzialari (4): Iñaki Antiguedad Zientzia Kaiera (2014-04-04)
- ↑ «Onintza Enbeita izango da Iñaki Antiguedaden ordezkoa Espainiako Kongresuan»[Betiko hautsitako esteka], Berria, 2012-04-19.
- ↑ «Onintza Enbeitak hartuko du Iñaki Antiguedaden lekukoa, Madrilen», Gara, 2012-04-20.
- ↑ «Antiguedad eserlekua uztera 'behartu' dutela salatu du Amaiurrek», EITB.com, 2012-04-19.
- ↑ «Onintza Enbeitak 'legeak aginduta' hartu du diputatu kargua», EITB.com, 2012-06-20.
- ↑ «Uno de cada tres diputados tiene otra ocupación aunque la ley lo prohíbe», Diario El Aguijón, 2012ko apirila.
- ↑ Iñaki Antiguedaden idazlanak, Inguma datu-basearen arabera (>50 produktu)
- ↑ Mendiguren Bereziartu, Xabier. «NorDaNor | EIZIE» nordanor.eus (Noiz kontsultatua: 2020-02-21).
- ↑ Artetxe, Karmele 1976-. (2011). Euskara unibertsitatera bidean : eragileak eta proiektuak (1939-1990). Udako Euskal Unibertsitatea ISBN 978-84-8438-374-1. PMC 907050485. (Noiz kontsultatua: 2020-03-27).
Kanpo estekak
| Autoritate kontrola |
|---|
Datuak: Q2917455
Multimedia: Iñaki Antigüedad / Q2917455
